Það var gott að hittast að loknu sumarleyfi þann 12. september. Til fundarins mættu 27 systur og eftir tendrun kerta og lestur hvatningar og markmiða minnstust systur látinnar systur, Unnar Magnúsdóttur, með mínútu þögn. 

Margt þurfti að ræða og fór formaður yfir efni forsetabréfs. Rætt var um verkefni en klúbburinn styrkti unga stúlku í Sierra Leone, ljósmyndanema, og fengum við að sjá afrakstur hennar vinnu. Hún tók að sér að taka myndir fyrir dagatal sem gefið verður út fyrir árið 2023. Afar mikið úrval af fallegum myndum sem velja þarf úr.

Í lok fundarins flutti Arna Hrönn Egó erindi sitt þar sem hún sagði sína sögu sem hreyfði við öllum sem á hlýddu. 

Systur í Árbæjarklúbbi voru duglegar að mæta á landssambandsfund í Ólafsvík 23. apríl 2022. Alls 16 systur mættu til fundarins sem er rétt um 40% félaga. Við erum stoltar af því hversu margar áttu heimangengt til að láta sig starf landssambandsins varða. Það er líka svo gaman að vera saman og kynnast systrum úr öðrum klúbbum. 

Systur í Snæfellsnesklúbbi áttu veg og vanda að skipulagi og fórst það afar vel úr hendi. Við Árbæjarsystur þökkum kærlega fyrir okkur ❤

Árbæjarklúbbur var með blómasölu fyrir páskana í fjáröflunarskyni. Boðið var upp á gula túlípana, 10 stk. í hverjum vendi sem seldir voru á kr. 3.000,-

Óhætt er að segja að salan hafi gengið vel því heildarsala var vel á fjórða hundrað vendir. Afhending fór fram 7. apríl og ljóst að gulir túlípanar prýða nú heimili margra velunnara klúbbsins og kunnum við þeim öllum bestu þakkir fyrir að styðja Soroptimista til góðra verka. 

Á myndinni má sjá Valborgu, formann klúbbsins, við afhendingu blómanna í vorsólinni í aprílbyrjun.

Njótið páskahelgarinnar og gleðilega páska.