Klúbburinn hefur undanfarin ár, í samstarfi við Minjasafn Austurlands, staðið fyrir öskupokasmiðju. Í ár var hún haldin á bolludaginn 20. febrúar og mættu þangað 20 börn og 6 fullorðnir.

Námskeiðið "Þú og þinn styrkur" var haldið 28. janúar 2023 í Hlymsdölum.  Þátttakendur voru rúmlega 20 stúlkur fæddar árið 2010 úr 4 grunnskólum í Múlaþingi. Leiðbeinendur voru sem fyrr Jónína Kristjánsdóttir, María Kristmundsdóttir og Eygló Daníelsdóttir.  

Efni námskeiðsins og uppsetning var með sama sniði og 2021 og má lesa nánari lýsingu á innihaldi og framkvæmd í grein Eyglóar Daníelsdóttur frá námskeiðinu 2021

 Hádegisverður og miðdegishressing voru í boði okkar systra og fengum við sendar ljúffengar veitingar frá Bókakaffi.

Ragnheiður Þorsteinsdóttir hlaut hvatningarverðlaun Soroptimistaklúbbs Austurlands við útskrift úr ME í desember 2022.

Verðlaunin eru veitt fyrir góðan árangur sem náðst hefur þrátt fyrir erfiðar aðstæður.

16 daga átak gegn kynbundnu ofbeldi 2022

Þekktu rauðu ljósin - Soroptimistar hafna ofbeldi er slagorð íslenskra Soroptimista í 16 daga átakinu að þessu sinni. Átakið sem leitt er af Sameinuðu þjóðunum og er alþjóðlegt hefst 25. nóvember og því lýkur 10. desember.
Um allan heim sameinast hin ýmsu samtök í því að vekja athygli á kynbundnu ofbeldi með ýmsum hætti en roðagylltur litur er einkenni átaksins, #roðagyllumheiminn, #orangetheworld, en hann á að tákna bjartari framtíð.
Markmið 16 daga átaksins að þessu sinni er að beina athyglinni að forvörnum og fræðslu og hafa Soroptimistar útbúið fræðsluefni um hinar ýmsu myndir ofbeldis sem flokka má í sex flokka:
andlegt ofbeldi, líkamlegt ofbeldi, kynferðislegt ofbeldi, fjárhagslegt ofbeldi, stafrænt ofbeldi og eltihrellir. Ekki er alltaf auðvelt að átta sig á því að um ofbeldi sé að ræða í samböndum fólks en það getur átt sér stað óháð kyni, aldri og kynhneigð.

Samkvæmt rannsóknum hafa 15% til 20% íslenskra kvenna og 5% til 10% íslenskra karla verið beitt ofbeldi af maka sínum eða þeim sem þau voru í ástarsambandi við og líklega búa um 2% íslenskra kvenna við ofbeldi hverju sinni.

Íslenskir Soroptimistar, sem eru nú um 600 í 19 klúbbum, hvetja alla til að kynna sér málefnið, fræðast og leggja sitt af mörkum til að stöðva ofbeldi.
Soroptimistasystur munu þessa 16 daga vekja athygli meðal annars með því að klæðast roðagylltum fatnaði, selja ýmsan varning, birta greinar og fræðsluefni. Roðagyllti liturinn verður áberandi á byggingum víða um land og einnig á sendiráðum Íslands víða um heim.

Soroptimistaklúbbur Austurlands efnir af þessu tilefni til Ljósagöngu 25. nóvember. Hún hefst kl.17:00 við Egilsstaðakirkju og gengið verður að Valaskjálf, þar sem boðið verður upp á léttar veitingar og flutt verða stutt erindi. Viðbragðsaðilar, félagsþjónustan og þolandi ofbeldis verða meðal þeirra sem þarna stíga á stokk.

Allir eru velkomnir í gönguna og í Valaskjálf.

"Þekktu rauðu ljósin - Soroptimistar hafna ofbeldi”

Í vor fórum við að huga að gróðursetningu á Seyðisfirði sem átti að fara fram í fyrra (sbr. frétt).  Urðum við mjög glaðar þegar í ljós kom að hægt var að gróðursetja plönturnar í skriðusárið í hlíðinni fyrir ofan planið þar sem Silfurhöllin stóð áður.

Þriðjudaginn 28. júní fórum við svo í verkið. Begga kom með plönturnar sem hún hafði fóstrað síðan í fyrra, gróðursetningarverkfæri og áburð. Vaskur hópur systra og aðstoðarmanna var mættur til starfa og er skemmst frá því að segja að eftir réttan klukkutíma var búið að gróðursetja allar plönturnar og koma stóru plöntunni, sem pottuð var í fyrra, á heiðursstað í hlíðinni.

Skammt frá þar sem við vorum að planta, stendur grenitré, sem stóð af sér skriðuna og fékk nafnið Von eftir það. Var um það rætt í hópnum hvaða nafn plantan okkar ætti að fá. Ósk eða Trú voru efst á blaði, en ekki var ákveðið um það endanlega.

Að lokinni gróðursetningu var komið við á Skaftfelli og snæddur kvöldverður.

Bekkur í búningsklefa fatlaðra var afhentur Íþróttamiðstöðinni á Egilsstöðum þann 1. júní 2022.  Hann var keyptur fyrir ágóða af sölu kærleikskúla og jólaóróa, en fjármunir sem þannig er aflað eru eyrnamerktir fötluðum ungmennum á austurlandi.

Björn Ingimarsson, Karen Erla Erlingsdóttir og Guðmundur Jóhannsson tóku við gjöfinni fyrir hönd Múlaþings og buðu upp á kaffi og köku.  Á myndinni eru auk Björns, Kristjana formaður og Þorbjörg gjaldkeri.