Þekktu rauðu ljósin !

16 daga átak gegn kynbundnu ofbeldi 2022

spjald framspjald bakÞekktu rauðu ljósin - Soroptimistar hafna ofbeldi er slagorð íslenskra Soroptimista í 16 daga átakinu að þessu sinni. Átakið sem leitt er af Sameinuðu þjóðunum og er alþjóðlegt hefst 25. nóvember og því lýkur 10. desember.
Um allan heim sameinast hin ýmsu samtök í því að vekja athygli á kynbundnu ofbeldi með ýmsum hætti en roðagylltur litur er einkenni átaksins, #roðagyllumheiminn, #orangetheworld, en hann á að tákna bjartari framtíð.
Markmið 16 daga átaksins að þessu sinni er að beina athyglinni að forvörnum og fræðslu og hafa Soroptimistar útbúið fræðsluefni um hinar ýmsu myndir ofbeldis sem flokka má í sex flokka:
andlegt ofbeldi, líkamlegt ofbeldi, kynferðislegt ofbeldi, fjárhagslegt ofbeldi, stafrænt ofbeldi og eltihrellir. Ekki er alltaf auðvelt að átta sig á því að um ofbeldi sé að ræða í samböndum fólks en það getur átt sér stað óháð kyni, aldri og kynhneigð.

Samkvæmt rannsóknum hafa 15% til 20% íslenskra kvenna og 5% til 10% íslenskra karla verið beitt ofbeldi af maka sínum eða þeim sem þau voru í ástarsambandi við og líklega búa um 2% íslenskra kvenna við ofbeldi hverju sinni.

Íslenskir Soroptimistar, sem eru nú um 600 í 19 klúbbum, hvetja alla til að kynna sér málefnið, fræðast og leggja sitt af mörkum til að stöðva ofbeldi.
Soroptimistasystur munu þessa 16 daga vekja athygli meðal annars með því að klæðast roðagylltum fatnaði, selja ýmsan varning, birta greinar og fræðsluefni. Roðagyllti liturinn verður áberandi á byggingum víða um land og einnig á sendiráðum Íslands víða um heim.

Soroptimistaklúbbur Austurlands efnir af þessu tilefni til Ljósagöngu 25. nóvember. Hún hefst kl.17:00 við Egilsstaðakirkju og gengið verður að Valaskjálf, þar sem boðið verður upp á léttar veitingar og flutt verða stutt erindi. Viðbragðsaðilar, félagsþjónustan og þolandi ofbeldis verða meðal þeirra sem þarna stíga á stokk.

Allir eru velkomnir í gönguna og í Valaskjálf.

"Þekktu rauðu ljósin - Soroptimistar hafna ofbeldi”

Gróðursetning á Seyðisfirði

gr sey hopurÍ vor fórum við að huga að gróðursetningu á Seyðisfirði sem átti að fara fram í fyrra (sbr. frétt).  Urðum við mjög glaðar þegar í ljós kom að hægt var að gróðursetja plönturnar í skriðusárið í hlíðinni fyrir ofan planið þar sem Silfurhöllin stóð áður.

Þriðjudaginn 28. júní fórum við svo í verkið. Begga kom með plönturnar sem hún hafði fóstrað síðan í fyrra, gróðursetningarverkfæri og áburð. Vaskur hópur systra og aðstoðarmanna var mættur til starfa og er skemmst frá því að segja að eftir réttan klukkutíma var búið að gróðursetja allar plönturnar og koma stóru plöntunni, sem pottuð var í fyrra, á heiðursstað í hlíðinni.

Skammt frá þar sem við vorum að planta, stendur grenitré, sem stóð af sér skriðuna og fékk nafnið Von eftir það. Var um það rætt í hópnum hvaða nafn plantan okkar ætti að fá. Ósk eða Trú voru efst á blaði, en ekki var ákveðið um það endanlega.

Að lokinni gróðursetningu var komið við á Skaftfelli og snæddur kvöldverður.

Gjöf til Íþróttamiðstöðvarinnar á Egilsstöðum

egs afhBekkur í búningsklefa fatlaðra var afhentur Íþróttamiðstöðinni á Egilsstöðum þann 1. júní 2022.  Hann var keyptur fyrir ágóða af sölu kærleikskúla og jólaóróa, en fjármunir sem þannig er aflað eru eyrnamerktir fötluðum ungmennum á austurlandi.

Björn Ingimarsson, Karen Erla Erlingsdóttir og Guðmundur Jóhannsson tóku við gjöfinni fyrir hönd Múlaþings og buðu upp á kaffi og köku.  Á myndinni eru auk Björns, Kristjana formaður og Þorbjörg gjaldkeri.

Hreinsunardagur í Kirkjumiðstöðinni 30. maí 2022

kma ukrÁrlegur hreinsunardagur í KMA var vel sóttur bæði af systrum, úkraínskum vinkonum, börnum og einum maka.  Útivinnan gekk sérstaklega vel, enda margar hendur að verki og innandyra voru herbergin þrifin og gerð klár fyrir sumarbúðirnar.

Í lok dags borðuðu svo allir dásemdar mat í boði KMA, eldaðan af okkar eigin Rúnu Dóru.

 

Vinkonur um veröld alla 2022

rusa seyVerkefnið "Vinkonur um veröld alla" hefur verið í gangi síðastliðið ár, þó viðburðir hafi verið færri en til stóð, vegna ytri aðstæðna.

Laugardaginn 28. maí 2022 hittumst við í Seyðisfjarðarkirkju.  Þar voru saman komnar konur frá Íslandi, Úkraínu, Danmörku, Georgíu, Póllandi, Tékklandi, Þýskalandi, ogHollandi. 

Sigga Dís bauð konur velkomnar og síðan tóku við ýmsir listamenn. Áslaug Sigurgestsdóttir kvað rímur.

Rusa Petriashvili frá Georgíu söng lög frá Georgíu og Úkraínu við eigin undirleik.  Einnig spilaði hún Úkraínska þjóðsönginn á kirkjuorgelið.

Síðan var farið í Safnaðarheimilið þar sem bornar voru fram veitingar sem komu úr ýmsum áttum.

 

Hvatningarverðlaun í maí 2022

hva 0522Karen Helga Ómarsdóttir hlaut hvatningarverðlaun Soroptimistaklúbbs Austurlands við útskrift úr ME 20. maí 2022.

Verðlaunin eru veitt fyrir góðan árangur sem náðst hefur þrátt fyrir erfiðar aðstæður.