Forseti Landssambandsins Sigrún Þorgeirsdóttir kom í heimsókn til Kópavogsklúbbs.  Hún sagði okkur frá því helsta sem hún vill að stjórnin beini sjónum sínum að þ.e að grunnstoðunum fjórum sem við minnumst í hvert skipti sem við kveikjum á kertum á fundum. Stjórn sambandsins ætlar  líka að leggja sérstaka áherslu á að kynna Evrópusamband Soroptimista í tilefni af því að systir okkar, Hafdís Karlsdóttir í Kópavogsklúbbi, tekur við embætti forseta þar í byrjun næsta árs. Einnig talaði hún um að einnig væri áhugi á því að kynna starfið á vettvangi Alþjóðasambands Soroptimista í tilefni af næsta heimsþingi Soroptimista í Dublin í lok júlí nk.

Á myndinni er Sigrún Þorgeirsdóttir forseti ásamt Þóru Guðnadóttir formanni

Þrjár nýjar systur voru boðnar velkomnar í klúbbinn þær Kristín Bryndís Guðmundsdóttir, Gerður Sigurðardóttir og Sigrún Halldórsdóttir. Stilltu þær sér upp í hefðbundna myndatöku með sínum meðmælendum og formanni.

Aðalfundur Soroptimistaklúbbs Kópavogs var haldin mánudaginn 16. janúar 2023. Tvær systur gengu úr stjórn og voru þeim færðar rósir. Á myndinni hér fyrir neðan eru þær sem gengu úr stjórn Hulda Skúladóttir og Kristín Helga Ólafsdóttir ásamt formanni Þóru Guðnadóttur

Þrjár nýjar systur voru boðnar velkomnar í klúbbinn þær Jónína Árnadóttir Linda Björk Hlynsdóttir og Steinunn Tryggvadóttir. Stilltu þær sér upp í hefðbundna myndatöku með sínum meðmælendum.

Jólafundur Soroptimistaklúbbs Kópavogs var haldinn 12. desember sl. Það var góð mæting á jólafuninn eða um 40  systur, auk átta gesta sem komu á fundinn til að kynna sér starfsemi klúbbsins. Skemmtinefndin sá um dagskrána, söngur og gítarleikur, Ninný las upp skemmtisögu og haldið var happadrætti. Fjáröflun klúbbsins að þessu sinni þ.e. síldarsalan hefur gengið mjög vel. Búið er að kaupa Bónuskort fyrir bágstadda í Kópavogi sem búið er að útdeila til prestanna í Kópavogi. Ákveðið var að safna peningum fyrir jólagjöfum handa börnum í stað þess að vera með jólapakka handa hver annarri. Einnig á að kaupa gjafir fyrir flóttafólk frá Úkraníu. Síðan var sungið saman í lok fundar. Yndisleg samvera og hátíðleg. 

Lindarkirkja hefur verið lýst upp í roðagylltum lit til að vekja athygli á 16 daga alþjóðlega átakinu okkar að roðagylla heiminn.   "Þekktu rauðu ljósin - Soroptimistar hafna ofbeldi" er slagorð íslenskra Soroptimista í 16 daga átakinu að þessu sinni. Átakið sem leitt er af Sameinuðu þjóðunum og er alþjóðlegt hefst 25. nóvember og því lýkur 10. desember.
Um allan heim sameinast hin ýmsu samtök í því að vekja athygli á kynbundnu ofbeldi með ýmsum hætti en roðagylltur litur er einkenni átaksins, #roðagyllumheiminn, #orangetheworld, en hann á að tákna bjartari framtíð.
Markmið 16 daga átaksins að þessu sinni er að beina athyglinni að forvörnum og fræðslu og hafa Soroptimistar útbúið fræðsluefni um hinar ýmsu myndir ofbeldis sem flokka má í sex flokka:
andlegt ofbeldi, líkamlegt ofbeldi, kynferðislegt ofbeldi, fjárhagslegt ofbeldi, stafrænt ofbeldi og eltihrellir. Ekki er alltaf auðvelt að átta sig á því að um ofbeldi sé að ræða í samböndum fólks en það getur átt sér stað óháð kyni, aldri og kynhneigð.

Júnífundur Soroptimistaklúbbs Kópavogs var haldin í Lækjarbotnum þar sem klúbburinn hefur oft haldið sína júnífundi. Klúbburinn hefur verið að rækta upp í  Lækjarbotnum við Selfjall frá 1993. Nokkrar myndir frá fundinum.

10 systur frá Soroptimistaklúbbi Kópavogs mættu á Landssambandsfund á Snæfellsnesi dagana 22. -  24. apríl 2022.