Vinkonukvöld Soroptimistaklúbbs Suðurlands var haldið 20. september sl. að Þingborg í Flóahreppi. Vinkonukvöldið hefur fest sig í sessi sem aðal fjáröflunarverkefni klúbbsins þar sem bróðurpartur ágóðans rennur jafnan til jólagjafaverkefnis klúbbsins sem unnið er í samstarfi við félagsþjónustur sveitarfélaga á Suðurlandi og ætlað að styrkja efnaminni konur og börn þeirra.  

Fastir liðir voru eins og venjulega fordrykkur, léttar veitingar, gnægtarlegt happdrætti og sýning á hausttískunni sem að þessu sinni var frá versluninni Lindinni á Selfossi. Sýndu klúbbsystur faglega takta í sýningarstörfum auk þess sem þær kynntu skinnavörur og eigin handverk. 

Heiðursgestir kvöldsins voru hjónin Albert Eiríksson og Bergþór Pálsson og fataðist þeim ekki flugið frekar en fyrri daginn þegar þeir gáfu innsýn í líf sitt og tilveruna.  Systurnar Unnur Birna og Dagný Halla Björnsdætur skemmtu með hljóðfæraleik og söng eins og þeim einum var lagið, enda dætur Bassa frá Glóru sem Sunnlendingum er að góðu kunnur á tónlistarsviðinu.

Veislustjórar kvöldsins voru þær Fanney Björg og Margrét Ýrr  sem leystu verkefni sitt vel af hendi m.a. með hjálp hinnar færeysku Turillu sem sendi þeim skilaboð á myndbandi um að koma sér í fjörið á íslensku elliheimili. 

Á þessu vinkonukvöldi var sú nýlunda að eiginmenn og synir  klúbbsystra þjónuðu til borðs og tóku að sér öll eldhússtörf meðan á skemmtuninni stóð og hafði húsvörðurinn orð á því að hún ætti því ekki að venjast að nánast væri búið að ganga frá öllu í eldhúsinu þegar skemmtuninni lyki eins og reyndin var hjá piltunum. 

Vinkonukvöldið þótti heppnast vel og eru systur þakklátar öllum þeim er lögðu hönd á plóginn með sjálfboðavinnu og framlögum af ýmsu tagi.

Fréttaskot frá klúbbfundum 2018-2019

Októberfundurinn á Hótel Örk í Hveragerði:

Hlýtt var á fyrirlestur Trausta Steinssonar um kynni hans af transbörnum. Hann fléttaði mál sitt við frásagnir úr bók sem hann hafði nýlokið við að þýða og er hugsuð sem nokkurs konar handbók fyrir foreldra transbarna. 

Nóvemberfundurinn í Eldhúsinu, Selfossi:

Gestur fundarins var Rannveig Brynja Sverrisdóttir aðalvarðstjóri hjá Lögreglunni á Suðurlandi. Hún ræddi um fíkniefnavanda sem steðjar að þjóðinni, en honum hefur hún kynnst m.a. þegar hún var starfandi í fíkniefnalögreglunni í Reykjavík.   

Desemberfundur, jólafundurinn,  að Stekkum í fyrrum Sandvíkurhreppi:

Systur lögðu á sameiginlegt jólahlaðborð, hlýddu á EGO erindi og léku sér. Friður aðventunnar sveif yfir vötnunum þetta kvöld.

Janúarfundurinn að 360° Boutique Hotel & Lodge í Flóahreppi:

Hlýtt á Aðalheiði Jóhönnu Ólafsdóttur lesa ljóð eftir Goethe bæði á íslensku og þýsku. Hún er Waldorfkennari og kennir m.a. hreyfitækni er hún nefnir hrynlist. Hún kenndi systrum nytsamar æfingar til að losa spennu og áhyggjur og taka til sín kærleika.  

Febrúarfundurinn í Eldhúsinu, Selfossi:

Gestur fundarins var Jónína Lóa Kristjánsdóttir með erindi sitt sem hún nefndi  ,,Hamingja og hugarró”. Jónína er hjúkrunarfræðingur að mennt með sérnám í heilsugæsluhjúkrun. Hún hefur einnig lært fjölskyldufræði og kynnst jóga.

Marsfundurinn að Miðási í Ásahreppi:

Margrét Ýrr,  hjúkrunarfræðingur og  systir í Soroptimistaklúbbi Suðurlands,  var með fræðslu um grundvallaratriði endurlífgunar. Hún sýndi systrum skyggnur og fræddi þær um notkun hjartastuðtækja. Hún sýndi einnig handtök til að hjálpa fólki sem stendur í og að lokum leyfði hún systrum að hnoða og blása í dúkku.

Aprílfundurinn í Eldhúsinu, Selfossi:

Þórný Björk systir í Soroptimistaklúbbi Suðurlands fjallaði um dáleiðslu en hún er nýlega útskrifuð sem dáleiðslutæknir og hyggur á áframhaldandi nám í þeim fræðum. Hún endaði erindi sitt á því að bjóða systrum upp á slökun sem þær þáðu.

Maífundurinn í Betri stofunni, Hótel Selfossi:

Ingridar Kuhlman flutti fyrirlestur um hamingjuna. Ingrid er með meistaragráðu í hagnýtri jákvæðri sálfræði frá Bretlandi þar sem lokaverkefni hennar var ,,eigindleg rannsókn á skynjun og skilningi eldri borgara á vellíðan“ Verkefni hennar birtist systrum sem kvikmynd um hamingjuna.  

Júnífundurinn að Jörfa í Hrunamannahreppi:

Fundurinn fléttaðist inn í vorferð klúbbsins sem lesa má um í væntanlegu jólablaði Fregna 2019 

Septemberfundurinn á Kaffi Sel, Golfskálanum Flúðum. Hann var jafnframt 100. fundur Soroptimistaklúbbs Suðurlands:

Tvær nýjar systur voru boðnar velkomnar í klúbbinn á þessum fundi, þær Charlotta Ingadóttir og Guðrún Ólöf Jónsdóttir. 

Soroptimistaklúbbur Suðurlands hélt sitt árlega Vinkonukvöld í Þingborg 20. september sl. Mjög góð aðsókn var og skemmtu konur sér vel.

Edda Björgvinsdóttir og dóttir hennar, Margrét Ýrr Sigurgeirsdóttir, voru veislustjórar og fórst þeim það vel úr hendi. Sigþrúður Guðmundsdóttir, forstöðumaður Kvennaathvarfsins, hélt skemmtilega framsögu um lífið og tilveruna. Jóna Kristín Snorradóttir sem er konan að baki JK-Design kynnti hönnun sína og konur á öllum aldri sýndu fatnað hennar við góðar undirtektir. Ung söngkona úr Hveragerði, Berglind María Ólafsdóttir, heillaði alla með söng sínum.

Ölvisholt Brugghús bauð gestum upp á fordrykk og margir aðilar styrktu þetta Vinkonukvöld með vinningum í happdrætti sem alltaf vekur lukku.

Stór hluti ágóða Vinkonukvöldanna rennur til kvenna á Suðurlandi sem af einhverjum ástæðum þurfa aðstoð til þess að klæða börn sín. Haft er samband við félagsþjónustur á Suðurlandi sem kanna þörfina og láta í té óskalista. Fyrir jólin 2017 fengu 40 börn víðs vegar um Suðurland hlýjan útivistarfatnað að tilstuðlan Sorpotimistaklúbbs Suðurlands.

Að þessu sinni rennur einnig hluti ágóðans til Kvennaathvarfsins sem þakklætisvottur fyrir framlag Sigþrúðar til Vinkonukvöldsins.

Að lokum vill Soroptimistaklúbbur Suðurlands þakka öllum konum sem tóku þátt í Vinkonukvöldinu í Þingborg 20. september sl. fyrir frábæra samveru og hjálp við að ná markmiði sínu að bæta stöðu kvenna og barna á Suðurlandi.