LÁTINNA SYSTRA Í BAKKA- OG SELJAKLÚBBI MINNST

Arnheiður Ingólfsdóttir lést 11. apríl 2024.  Arnheiður kom til liðs við Soroptimistaklúbb Bakka og Selja 1988, en hafði áður verið í Soroptimistaklúbbi Keflavíkur frá 1981. Hún var afar virk í Bakka og Selja klúbbi alla tíð, gegndi öllum stöðum innan stjórnar klúbbsins, var fulltrúi og verkefnastjóri m.a. heilbrigðismála og tók þátt í fjölda nefnda. Hún var einnig verkefnastjóri heilbriðgðismála hjá Landssambandinu.

Arnheiður hafði sérlega góða, hlýja og notalega nærveru. Alltaf var gott að leita til hennar og alltaf var hún boðin og búin að leggja hönd á plóg og taka þátt í hverju sem var.  Hún var hjúkrunafræðingur að mennt og starfaði sem hjúkrunarforstjóri í Skjóli. Blessuð sé minning yndislegrar systur, hennar verður sárt saknað.

Við systur í Soroptimistaklúbbi Bakka og Selja minnumst heiðursfélaga okkar Gretu Bachmann af hlýhug og virðingu fyrir ötult starf í þágu Soroptimista og sem góðrar vinkonu til margra ára.

Greta Bachmann gekk í Soroptimistaklúbb Bakka og Selja árið 1981, þegar klúbburinn var tæplega eins árs og var því iðulega talin með í stofnfélagahópnum. Hún tók strax að sér stjórnunarstörf innan klúbbsins og var formaður 1988-90. Hún lét þar ekki staðar numið og tók að sér flest þau embætti sem í boði voru og sat í mörgum nefndum innan klúbbsins. Alls staðar vann hún ötullega að málefnum Soroptimista, sem stuðla meðal annars að mannréttindum og félagslegri þróun. Einnig tók hún að sér nefndarstörf fyrir Landssamband Soroptimista og var t.d. í útbreiðslunefnd þegar Snæfellnesklúbbur var stofnaður.  Blessuð sé minning Gretu Bachmann. 

Í apríl 2021 lést Sigríður Sveinsdóttir, systir okkar í Bakka- og Seljaklúbbi. Hún var yndisleg systir og er sárt saknað. Minning hennar mun lifa í hug og hjörtum okkar systra hennar.

 Haustið 2020 lést yndisleg systir okkar í Bakka- og Seljaklúbbi, Þyri Dóra Sveinsdóttir. Minning hennar lifir í hug og hjörtum okkar systra. Blessuð sé minning Þyriar Dóru.