Sólveig Pálsdóttir - Blóðdropinn 2020

Sólveig Pálsdóttir hlaut Blóðdropann 2020 fyrir skáldsögu sína, Fjötra. Verðlaunin eru veitt árlega fyrir bestu íslensku glæpasögu undanfarins árs. Útgefandi bókarinnar er Salka. Í ár voru 20 glæpasögur tilnefndar. Hið íslenska glæpafélag stendur að verðlaununum og er verðlaunabókin framlag Íslands til Glerlykilsins, norrænu glæpasagnaverðlaunanna árið 2021. Dónmefnd skipuðu Páll Kristinn Pálsson, formaður, Helga Birgisdóttir og Kristján Atli Ragnarsson.

Í umsögn dómnefndar segir Fjötrar eftir Sólveigu Pálsdóttur sé verðskuldaður
sigurvegari. Sólveig fléttar saman á frumlegan og öruggan hátt
sögum af mannshvarfi, misnotkun og sjálfsskaða í spennandi frásögn sem
litast af leyndarmálum fjölskyldna. Ljóst er frá fyrstu síðu að lesandi er í öruggum
höndum höfundar sem hefur góð tök á öllum þráðum fléttunnar og hefur vandað til
verks. Frásögn Sólveigar er í senn spennandi, áhugaverð, kímin og sorgleg.
Afraksturinn er bók sem lætur engan ósnortinn.